5000 ka khusnam ia kiba ai jingtip halor kam tih bad shalan dewiong beaiñ

Syllad | The Rising MeghalayaSeptember 29, 2020

Ka tnad Mining & Geology kala pynmih iaka hukum ban ai khusnam pisa T.5000 sha kino kino kiba ai jingtip halor ka jingtih dewiong bad shalan dewiong beaiñ haka Jylla baroh kawei.

Kane ka khusnam kaba la pynkhreh ka tnad Mining and Geology ban ai kanlong katkum ka jingbthah jong ka National Green Tribunal (NGT) katkum ka hukum 17 Kyllalyngkot 2020 kaba la bthah iaka jylla ban shna iaka skhim ban ai khusnam iaki nongai jingtip ha kaba iadei bad ka jingtih dewiong beaiñ bad ka jingshalan dewiong ia u dewiong haka jylla.

U nongai jingtip un ioh ia kane ka khusnam hadien ba ula ai iaka jingtip lyngba ka number 18003453846. Uno uno uba ai jingtip halor ka kam tih dewiong bad shalan dewiong beain ula lah ban phone lane da kaba leit haka police station ba jan tam, sha uba dei khmih iaki check gate kiba hap haka DMR lane ha u Divisional Mining Officer ne sha uno uno u officer ne bor.

Kiba lah ban ioh ia kane ka khusnam lada u ai jingtip katkum ki kyndon ka skim bad yn ai sha ki ia u ‘Informant code’ ban ithuh ia u briew.

Shuh shuh lada kajuh ka jingjia yn pyntip palat ia uwei yn ai Informant Code la la ka jong bad ka khusnam yn iabhah. Yn burieh iaka kyrteng bad ka khusnam kaba siew sha u nongai jingtip ruh yn burieh.

“Ka jingtip ba ai halor ka jingshalan bad ka jingtih dewiong ruh kadei ban long kaba shisha khnang ba ka ain kan lah ban leh iaka donkam katkum ka kyndon jong ka Mines and Minerals (Development & Regulation) Act 1957.

U ophisar ba tohkit ruh u dei ban burieh iaka kyrteng jong u nongai jingtip, khnang ba u nongai jingtip un lait na ka jingshah byrngem byrsit,” la ong ka hukum kaba la pynmih da u Dr Manjunatha C, IFS Secretary Mining and Geology jong ka sorkar Jylla.

Kane ka pisa ruh yn ai da ka tnad Mining and Geology lyngba u ophisar hapoh 4 taiew.

Ka don ruh ka kyndon ba u nongai jingtip um lah ban ioh ia kane ka khusnam lada ym dei katkum ka kyndon jong ka skhim, kata lada dei bala ioh jingtip lypa ka tnad lane ba la pyllait ne iathuh sha kiwei pat kynthup sha ki khubor.

Ki shakri sorkar kim hap ha kane ka skim.

Shuh shuh lada ai jingtip ba bakla ne bymdei ruh yn ngat haka jingshah pynsaja.