50 iabit thymmai iaka jingpang COVID-19

Syllad | The Rising MeghalayaJanuary 5, 2022

Haka sngi Balang 50 ngut ki briew kila iabit thymmai iaka jingpang khlam COVID-19 bad da kane ka jingdon ki briew kiba dang shitom ka long 145 ngut hapoh ka Jylla.

Katkum ka jingpyntip ka tnad ka Koit ka Khiah, 50 ngut ki briew kiba ïabit thymmai ïa kane ka jingpangkhlam bad kine ki kynthup tang na East Khasi Hills 45 ngut, West Garo Hills 4 bad West Jaintia Hills 1.

Ki nongpang kiba la ioh pat iaka jingkoit ki don 2 ngut bad kine ki dei na East Khasi Hills.

Ka jingdon jong ki briew bala ïabit ïa kane ka jingpang khlam ha Jylla baroh ka long 84931 ngut bad napdeng kine 83301 ngut kila ïoh ïa ka jingkoit bad 1485 ngut kiba ïap nalor ki briew ba dang shitom.

Ka East Khasi Hills kadon 128 ngut kiba dang shitom, West Garo Hills 12, East Jaintia Hills 2, Ri Bhoi 2 bad West Jaintia Hills 1.