3 tylli ki eksam Centre na ka bynta ka eksam CUET ha Shillong

Syllad | The Rising MeghalayaMay 17, 2025

U Commissioner & Secretary ka Tnad Education, u Vijay Kumar Mantri haka sngi Thohdieng u pyntip ba ka National Testing Agency (NTA) ka la pynbna ban buh sa laitylli ki Eksam Centre ha Shillong na ka bynta ka jingpyniaid beit ia ka eksam Common University Entrance Test (CUET-UG) 2025.

Kine ki centre kiba thymmai ba la ithuh ha Shillong ki long ka St. Mary’s Higher Secondary School ka ban don 70 computer nodes, ka Shillong College 100 computer nodes bad ka Shillong ITI – 29 computer nodes.

“Ka Sorkar jylla ka la ai ka jingiatreilang bad ka NTA na ka bynta ban kyntiew ia ka jingdon jong ki eksam centre na ka bynta kane ka eksam ba la pynlong da ki kor computer. Na ka liang ka NTA ka la shimkhia ia kane da kaba iatreilang ryngkat bad ka sorkar ban pynthikna ia ka jingiaid beit iaid ryntih ha ka jingpyntreikam,” u la ong.

Katkum ka jingpynpaw ka jong u, u la ong ba kine ki centre kiba thymmai ki la plielad na ka bynta kito ki samla pule ba kin ioh ban thoh ia ki eksam jong ki hadien ba ki la shah pynngat kham hashwa ban leit thoh ia ki eksam jong ki sha ki centre kiba don sha ki jaka kiba jngai.

Katkum ka jingtip kaba dang shen eh ba la ioh na ka NTA, haduh 11,309 ngut ki samla pule ki dei ban iakhun ia ka eksam ka ban sdang naduh ka 19 tarik Jymmang. Na kine 1,376 ngut ki nongiakhun ki la ioh ban thoh ia ki eksam jong ki ha ki centre kiba don ha Guwahati, katba kiwep at kiba sah kin sa shah pynngat noh ha ki centre kiba don hapoh Meghalaya.

“Haba shim kyllum lang, mynta ym don shuh ki samla pule na Meghalaya kiba hap ban leit shabar ka Guwahati na ka bynta ban iakhun ia ka eksam CUET (UG). Baroh ki samla ki la ioh ban ialeh ia ki eksam jong ki ha ki centre kiba don ha Shillong, Tura ne Guwahati ka ban sdang naduh ka 19 tarik Jymmang. Halor kane ka jingbujli ia ki centre thoh eksam la dep ruh ban pyntip sha ki samla pule da ka NTA lyngba ka email lane message,” ong u Mantri.