3 sngi ai por ban pynkynriah iaki ñiut na Jowai: Tympang Iawmusiang sha ka Sorkar

Syllad | The Rising MeghalayaApril 19, 2022

Ka Dorbar Shnong Tympang Iawmusiang kala ai por lai sngi iaka sorkar jylla ban kynriah iaki ñiut kiba la lumthup ha Iawmusiang haka sngi ba Ar.

Katkum ka dorkhat kaba la ai da u waheh shnong Tympang Iawmusiang Ma Ajoy Lywait sha u Deputy Commissioner, West Jaintia Hills ula ong ba ka bor shnong kala dep shong jingialang halor kane ka jingsah kut ki ñiut ha Jowai khamtam ha Iawmusiang kaba la ijli ban peit bad kaba la wanrah iaka jingsma kaba shyrkhei kaba ktah iaka koit ka khiah u briew ba iaid ba ieng manla sngi, ki nongshong iew bad ki khynnah skul kiba iaid lyngba kine ka ñiut.

Ka Dorbar Shong Tympang Iawmusiang kala ai jingmut ban bret biang iaki niut sha ka jaka ba juh bret ha Mynkjai, namar ba kane ka jaka ka dei kaba la pyndonkam la 40 snem bad ha kine ki snem kam shym la don satia kano kano ka jingpang kaba ktah iaka koit ka khiah ki shnong ba marjan.

Kala ong ruh ba kane ka jaka ka don ha ki jaka ba shngain bad ka jngai na ki shnong haba nujor bad ka jingjlong jingman mynta ha Iawmusiang, Jowai kiba ki ñiut na kylleng ki jaka la theh ha Iawmusiang.

Pule | Bthah ka ïingbishar Meghalaya High Court ban kit ïaki ñiut ba lumthup ha Jowai

Ka bor shnong ka kyrshan iaka sorkar iaka jingpyrshang jong ka ban wad ki lad ki lynti ban wad jaka bret ñiut sha wei, pynban ka jingphiel ka sorkar ban pynlang iaki ñiut na Jowai ka bor shnong kala ai por 3 sngi ban pynkynriah ia baroh ki ñiut na Iawmusiang bad ka bor shnong kala byrthen lada ym lah ban pynkhuid iaki ñiut kan shimda kiwei ki sien jam.

Shuh shuh ka Dorbar Shnong Tympang Iawmusiang kan shong jingialang biang bad ban shim iaka rai bad ka sur kaba mih kalong ban khang ia baroh kawei ka iew.