3 snem shah rai set phatok u rangbah uba thmu leh beijot ia ka khynnah rit

Syllad | The Rising MeghalayaOctober 12, 2023

Ka kashari Special Judge (POCSO), West Jaintia Hills District, Jowai ka la rai pynrem da kaba set phatok lai snem kynthih ha ryngkat ka kuna kaba long T.5000 pyrshah u rangbah uba kyrteng u Lucky Dhar namar ka jingdonkti ha kaba thmu leh beijot ia ka khynnah kaba dang 10 snem rta kaba la jia ka 03.03.2019.

Ka kashari Special Judge (POCSO) kala rai pynrem ia u Lucky haka 29 tarik Nailur 2023.

U Superintendent of Police ka West Jaintia Hills, Jowai lyngba une u kyrwoh u la ong ba ha ka 03.04.2019 kawei ka longkmie kala wan ujor da ka FIR ha u Officer In-Charge, Amlarem Police Station da kaba pynpaw ba utei u briew (Lucky Dhar) u la pyrshang ban leh beijot ia ka khun jong ka kaba dang 10 snem rta hapoh ka iingsah jong ki. La iathuh ba une u Lucky ula jrongkti ia kane ka khynnah haka por ba ka dang thiah ba hadien ba kane ka khynnah ka la kyndit na ba iohthiah bad sdang ban iam.

Hadien ba la ioh jingtip halor kane ka jingjia, ka nongujor ka la leit sha u rangbah shnong uba la aijingmut ia ka ban leit ujor sha ki bor pulit. Kumta ki pulit ki la register case hapoh Amlarem Police Station Vide Amlarem PS Case No. 11(4)2019 hapoh ki kyndon 7/8/18 of Protection of Children from Sexual Offence Act (POCSO), 2012 pyrshah ia une u briew uba shah kynnoh donkti u Lucky Dhar.

Na ka liang u SI I Nongrum ka la shimti ia ka jingtohkit halor kane ka jingjia bad hadien la aiti sa sha ka Inspector PE Marwein ban pyndep ia ka jingtohkit.

Hadien ba la pyndep ia ka jingtohkit i Inspector PE Marwein i la chargesheet pyrshah ia une u briew uba la shah kynnoh donkti hapoh ki kyndon jong ka POCSO Act namar ka kam lehbor pyrshah ia ka khynnah rit.

Kumta hadien ki sakhi satar kiba biang bad hadien ba la dep ban tian bishar, ka Kashari Special Judge (POCSO), West Jaintia Hills District, Jowai, ha ka 29.09.2023 ha ka Special Session (POCSO) ka la lap ia ka jingdonkti jong u Lucky Dhar halor kane ka kam lehbor pyrshah ia kane ka khynnah bad pynbna ia katei ka rai pynrem.