255 tylli ki kam Sorkar ban pyndap ha WJH: Ha u Jylliew yn sdang ka DSC ia ki eksam

Syllad | The Rising MeghalayaJune 1, 2025

U Deputy Commissioner ka West Jaintia Hills bad Chairman ka District Selection Committee (DSC), u Abhinav Kumar Singh u la kyntait halor ki jingkam ba dang shen ba ki don haduh palat 560 tylli ki kam sorkar kiba lait hapoh ka DSC, da kaba shim ia kane ka jingai jingkhein ba bakla kum kaba  shu pynheh bad ialam bakla.

“Kane ka jingai jingkhein ia ki 560 tylli ki post ba la pynsaphriang ki kynthup ia ki post kiba dei shabar jong ka DSC, kata kum ki nonghikai, ki kam pynkiew kyrdan, ki kam muster roll bad ki kam hapoh ka MPSC,” ong u DC haba pynshai sha ki lad pathai kubor haka 31 tarik Jymmang.

U la pynthikna ba ka jingdon kaba shisha jong ki kam kiba lait ban pyndap lyngba ka DSC ki long baroh 255 tylli, kata katkum ki jingtip ba la pynshisha ia kiba la aiti da ki tnad bapher bapher hadien ki jingialang kiba la long ha ka 19 bad 26 tarik Jymmang.

Napdeng kine 255 tylli ki kam ba la pynthikna ki long 21 tylli ki kam Lower Division Assistants (LDA), 83 Grade III & IV nalor kiwei pat ki kam ba lait ha ka tnad bapher bapher ia kiba yn pyniakhun lang.

U DC u la ai ruh ia ki jingtip ba thymmai halor ka jingpynrung kam, kata 49 ki kam LDA bad 4 ki nongking lieng la dep lypa ban thung, bad la buh por ban pynlong ia ki interview ha kine ki artaiew ki ban wan na ka bynta ki 16 tylli ki kam, kata kynthup ia ka kam Sericulture Demonstrators, Gram Sevaks, bad Gram Sevika.

“Ngi dang pynbeit khatduh ha kaba iadei bad ki jingpynbna bad ngin sa pyllait hapoh kine ki ar sngi. Ia ki written test, typing test bad ki interview yn pynlong naduh u bnai Jylliew, bad ka thong ka jong ngi ka long ban pyndep ia kane ka jingpynrung kam baroh kawei kat haduh une u bnai Nailur lane Naiwieng u ban wan,” bynrap une u khlieh ka District.