21 tarik Rymphang ka elekshon sha ki ar tylli ki konsil: Prestone Tynsong

Syllad | The Rising MeghalayaDecember 17, 2024

Ka Sorkar Jylla haka 17 tarik Nohprah kala pynbna ba ka elekshon sha ka iing dorbar thawain jong ki ar tylli ki konsil, kata ka Jaintia Hills Autonomous District Council (JHADC) bad ka Khasi Hills Autonomous District Council kan long haka 21 tarik Rymphang 2025.

Haba kren ha ki lad pathai khubor, u symbud myntri rangbah ba dei khmih iaka tnad district council affairs (DCA) u bah Prestone Tynsong u la pyntip ba u Lat u la mynjur ia ka jingai jingmut jong ka kynhun myntri katkum ka jingtyrwa jong ka tnad DCA ban pynlong ia ka elekshon sha ki ar tylli ki autonomous district council.

U la ong ba ia ka jingpynbna na ka bynta ka elekshon ADC yn pynmih ha ka 27 tarik Kyllalyngkot katba ka tarik ba khatduh ban thep kyrteng kan long ha ka 3 tarik Rymphang bad ha kajuh ka sngi kan long ka jingbishar ia ki kot thep kyrteng bad ka tarik ba khatduh ban weng kyrteng kan long ha ka 4 tarik Rymphang.

“Ka tarik thep vote kan long ha ka 21 tarik Rymphang bad ia ka result yn pynbna ha ka 24 tarik Rymphang”, la ong u bah Tynsong.

Shwa ia kane, u symbud myntri rangbah u la pyntip ba ka tarik ban pynmih ia ka draft electoral rolls kan long ha ka 13 tarik u Kyllalyngkot bad ka tarik ba khatduh ban thep ia ki jingkam bad jingpyrshah kalong 22 tarik u Kyllalyngkot, ha ka 24 tarik u Kyllalyngkot ka jingpynkut noh bad ka jingpynbna khatduh ia ki thup kyrteng ki nongthep vote kan long ha ka 27 tarik Kyllalyngkot.

Haba kylli, u bah Tynsong u la pyntip ba ka model code of conduct kan treikam naduh ka tarik ba pynmih ia ka jingpynbna kaba long ha ka 27 tarik u Kyllalyngkot.

“Kumta, ka model code of conduct (MCC) ruh kan treikam mardor naduh ka 27 tarik Kyllalyngkot, ha ki district kiba hap hapoh ka jingpeit jong ka KHADC bad JHADC,” u la bynrap.

Katba ia ka jingpynlut ha ka elekshon na ka bynta ki ar tylli ki ADC, u bah Tynsong u la ong ba ia ka pisa na ka bynta kane yn ot noh na ki bhah ba dei ban siew sha ka KHADC bad JHADC.