20 snem shah rai set phatok 3 ngut kiba donkti ha kaba leh beijot kynhun

Syllad | The Rising MeghalayaJune 20, 2025

Ka iingkashari jong i DR Kharbteng, Additional Deputy Commissioner (Judicial) East Khasi Hills, ha ka 2 tarik Jylliew 2025 ka la rai pynrem ia ki laingut ki runar da kaba set phatok haduh 20 snem kynthih namar ka jingdonkti ha ka kam leh beijot kynhun (gangrape).

Kine ki laingut ki runar kiba la shah rai pynrem ki dei kiba la tip kyrteng kum u Marwello Lawai, u Elipsing Lawai bad u Rakesh Marboh kiba la shah kem halor ka case ba la register hapoh Mawryngkneng Police Station ha u snem 2022. 

Kine ki runar ki la shah pynngat hapoh ka kyndon 323 (kaba iadei bad ka jingpynmynsaw), 343 (kaba setkut jubor) bad 376 D (kaba leh beijot), ong u Superintendent of Police ka East Khasi Hills, u Bah Vivek Syiem lyngba u kyrwoh haka 19 tarik Jylliew.

“Ka iingkashari ka la hukum ruh ban set phatok ia ki shi snem hapoh ka kyndon 323 & 343 IPC bad 20 snem ha ryngkat ka kuna kaba mar T.1 lak hapoh ka kyndon 376D. Lada kim lah ban siew ia kane ka kuna, kine ki runar kin hap ban shong tam ha phatok na ka bynta 2 bnai,” u la ong.

Ia kane ka jingjia la pynlong jingtohkit da ka WP/SI KD Sangma kaba don mynta hapoh ka Directorate of Infiltration.