20 snem hukum set phatok ka iingkashari ia u runar ba leh beijot ia ka khynnah

Syllad | The Rising MeghalayaJune 4, 2025

Ka Iingkashari Special Judge (POCSO) ka East Khasi Hills, ka Kong MK Lyngdoh ka la rai pynrem ia u runar uba uba la shah pynngat ha ki kyndon bapher bapher jong ka POCSO Act bad IPC da kaba set phatok 20 snem kynthih namar ka jingleh beijot ia kawei ka khynnah.

Une u runar uba la shah rai pynrem u dei uba la tip kyrteng kum u Pynskhem Mawa uba la shah tian bishar haka mukotduma Special POCSO C/No.49/2021 kaba hap hapoh ka Sohra Police Station katkum ka case no 36 (10) 2020 U/S 3(a)/4/5(l)/6/7/8/9/10 POCSO Act R/W Sec 354/354A/354B/375(sixthly)/376(2)(j)(n)/503/506 IPC.

Ka Iingkashari ka la pynbna ia kane ka hukum rai pynrem pyrshah ia une u runar ha ka 29 tarik Jymmang da kaba set phatok 10 snem ha ryngkat ka kunar kaba T.30,000 hapoh ki kyndon 4 ka POCSO Act ba ba un shah set tam da saw bnai lada um lah ban siew ia kane ka kuna.

Une u runar u la shah rai pynrem ruh da kaba set phatok 20 snem bad ka kuna T.50,000 hapoh ka kyndon 6 jong ka POCSO Act bad ba un hap ban shong tam sa hynriew bnai lada um lah ban siew ia ka kunar.

Nalor kata ka Iingkashari ka la rai pynrem ruh ia une u runar da kaba set phatok 3 snem bad ka kuna T.10,000 hapoh ka kyndon 8 jong ka POCSO Act bad ba un hap ban shong tam ar bnai lada um lah ban siew ia ka kuna.

U Mawa ula shah rai pynrem ruh da kaba set phatok 7 snem ryngkat ka kuna kaba T.20,000 hapoh ka kyndon 10 jong ka POCSO Act bad ba un hap ban shong tam sa lai bnai lada um lah ban siew ia ka kuna.

Ka Iingkashari ka la hukum ruh ban set phatok 2 snem bad ka kuna T.10,000 hapoh ka kyndon 506 IPC bad un hap ban shong tam sa 2 bnai lada um lah ban siew ia ka kuna.

Ia kane ka case la tohkit da ka WPSI Kong V Diengdoh kaba don mynta ha Sohra Police Station.