20 snem ha phatok ngat u Thapa

Syllad | The Rising MeghalayaAugust 30, 2025

Ka iingbishar jong ka Kong M.K. Lyngdoh, Special Judge (POCSO), East Khasi Hills, ha ka 28 tarik Nailar 2025, ka la rai pynrem da kaba set phatok 20 snem ia u runar uba donkti ha kaba leh beijot ia ka khynnah ha u snem 2013.

U Superintendent of Police ka District u pyntip ba une u runar uba kyrteng u Kamal Kumar Thapa u dei uba la shah pynngat hapoh ka kyndon ain POCSO Act bad ki kyndon ain bapher bapher jong ka Indian Penal Code (IPC).

Hadien ka jingtian bishar ka iingkashari ka la rai pynrem ia une u runar hapoh ka kyndon ain jong ka POCSO da kaba rai set phatok 20 snem ha ryngkat ka kuna kaba T.50,000 ba lada um lah ban siew un hap ban shong phatok sa hynriew bnai hapoh ka kyndon 6 jong ka POCSO Act.

Ka Iingkashari ka la rai pynrem ruh ia une u runar da kaba set phatok 5 snem bad ka kuna T.10,000 hapoh ka kyndon 328 IPC.

Une u runar u la shah rai pynrem ruh da kaba set phatok 5 snem ha ryngkat ka kuna T.10,000 hapoh ka kyndon 366 A IPC.

Ia kane ka case la tohkit da u Insp. O. Syiemlieh uba don mynta hapoh Anti Infiltration Directorate, Meghalaya, Shillong.