18 ngut ki nongjngi ban shimbynta haka Himalayan Swimming Meet

Syllad | The Rising MeghalayaAugust 24, 2023

Ka Meghalaya Swimming Association (MSA) haka sngi Palei, kala pyntip ba kan phah haduh 18 ngut ki nongjngi ba kin iashim bynta sha ka iakop jngi kaba la tip ia ka kum ka 3rd  Himalayan Swimming Meet kaban long ha nongbah Gangtok, Sikkim, ha ka 26 une u bnai

Ha kane ka kynti, ka MSA ka long tang ma ka napdeng ki synjuk jngi jong ki jylla ki thain shatei lam mihngi ba kan shah khot sngewbha ban phah iala ki khynnah ki jong ka ban leit ban iashim bynta shakane ka jingiakob kaban long tang shi sngi.

Napdeng ki 18 ngut ki nongjngi, 8 ngut na ki dei ki khynnah kynthei bad 10 ngut pat ki dei ki khynnah shynrang kiban iakhun haka kyrdan jong ka Sub Junior, Junior bad Senior.

Shwa ba kane ka kynhun kan mih nangne na ka nongbah, ki dkhot ka Meghalaya Swimming Association ki la wan ba kin ai ia ka kitbok ka kiutrwiang ka sneng ka kraw ka kyntu ka kynpham ia kine ki khynnah kiba la shah jied ban mihkhmat ia ka jylla sha kane ka jingiakob.

Ha kane ka jingiakynduh lang la don lang u bah Joe Marwein President bad u Secretary bah Ian A Lyngdoh Nongkynrih, kiban ia  synran lang pat lang ia kane ka kynhun sha Sikkim.

Ka khubor kaba sngewtynnad ka long ba kane kadei ka  sien nyngkong ba ka MSA kan  leit ia shim bynta ha ka Himalayan Swimming Meet, ha kaba kiwei pat ki jylla kiban iashim bynta ki kynthup ia ki Team na Sikkim, Darjeeling, Kalimpong, Siliguri bad kiwei kynhun kiba dei na kane ka thain bad kiba  markhap  bad ka Sikkim.

Haba iakren bad ki katio katne ki khynnah kiba la shah jied ban iashim bynta sha kane ka jingiakob, ki pynpaw ia ka jingkmen ban ioh ia kat kane ka kabu ksiar ban mihkhmat ia ka jylla sha kane ka jinghiakob ryngkat ka kular ba kin pyrshang katba lah ban wanphai ryngkat bad ki takma.