17 tarik ka jingiakhih shong kyllaiñ myngngor ki nonghikai MUPSTA

Syllad | The Rising MeghalayaDecember 12, 2021

Ka synjuk ki nonghikai Meghalaya Upper Primary School Teachers Association (MUPSTA) Central Body kala rai ban pynlong da ka jingiakhih  da kaba shongkyllain myngngor (Sit- in- Demonstration) haka 17 tarik une u bnai harud surok All India Radio, Shillong (Opposite Governor Office Shillong).

Ia kane ka rai ka  MUPSTA kala shim haka jingialang Central Executive Committee (CEC) haka 8 tarik une u bnai kaba long ha nongbah Shillong.

U Ma EG War, Organising Cum Publicity Secretary MUPSTA Central Body ula ong ba kane ka jingiakhih da ka ba shongkyllain myngngor ka long ban pynpaw ia ka jingbym sngewhun iaka jingleh klet jongka sorkar ia ki jing dawa ban kyntiew deficit noh ia baroh ki 844 tylli ki Adhoc Upper Primary School ha Meghalaya baroh kawei.

Ula pynkynmaw ba ka sorkar ka la dep ban kular ban kyntiew deficit noh ia ki tei ki skul ha ka Teachers Conference kaba la long ha Asanang, Tura, West Garo Hills ha u snem 2018, hynrei haduh mynta mynne  ym pat iohi dak eiei ruh em ba ka sorkar kan shimkhia ia ki tei ki jingeh jong ki nonghikai skul.

Ka MUPSTA kala ther ia u Myntri ka tnad Education, Ma Lahkmen Rymbui uba la ong ba Sorkar kam lah ban kyntiew deficit ia baroh ki 844 tylli ki Upper Primary School ha Megjalaya.

Ka MUPSTA ka khot ka wer ia baroh ki nonghikai jong ka synjuk ban mih ryntih ha ka tei ka sngi ban pynbor iaka sorkar ban pynurlong iaka jingdawa.