14 snem shah rai set phatok u Kluston Ryntathiang ba leh beijot ia ka khynnah rit

Syllad | The Rising MeghalayaMarch 26, 2025

Ka iingkashari jong ka Swapna G. Momin, Special Judge (POCSO), East Khasi Hills, Shillong ha ka 11 tarik Lber 2025 ka la rai pynrem ia u Kluston Ryntathiang da kaba set phatok haduh 14 snem kynthih namar ka jingdonkti ha kaba leh beijot ia kawei ka khynnah rit.

U Superintendent of Police ka East Khasi Hills, u Bah Vivek Syiem, IPS lyngba u kyrwoh u pyntip ba kane ka rai pynrem pyrshah ia une u runar ka long halor ka Laban PS Case No. 128 (12) 2015 U/S 6 POCSO Act R/w Sec 506 IPC.

Ka Kashari nalor ka rai set phatok ka la hukum ruh ban siew ia ka kuna kaba long T.10,000/- bad lada um lah ban siew un hap ban shong tam ha phatok na ka bynta ar bnai.

La rai ruh ban pynshitom hapoh ka kyndon U/s 506 IPC da kaba set phatok na ka bynta lai snem bad ban siew ia ka kuna kaba T.5,000/-, bad lada um lah un hap ban shong tam sa na ka bynta shi bnai.

Kane ka rai pynrem ka la wan long ruh hadien ka jingtohkit da ka Inspector Phrianglin Syiem kaba bat mynta kum ka Reserve Inspector ha Police Reserve, Shillong.