14 snem shah rai set phatok ki 2 ngut ki runar ba beijot ia ka khynnah

Syllad | The Rising MeghalayaNovember 1, 2023

Ka nongbishar Special Judge (POCSO), East Khasi Hills, Shillong, ka la rai pynrem ia ki arngut ki runar kiba donkti ha kaba leh beijot ia kawei ka khynnah kaba dang 12 snem rta kaba dang pule ha ka klas VII da kaba set phatok 14 snem kynthih nalor ka kunar kaba mar T.50,000.

U Superintendent of Police,ka East Khasi Hills, Shillong u Bah Sylvester Nongtnger, IPS haka sngi Balang u la ong ba ha ka 03.12.2018, ki bor pulit ki la ioh pdiang ia ka jingujor FIR halor ka jingshah leh beijot jong kawei ka khynnah kaba dang 12 snem rta, kaba pule ha ka klas VII ha uwei u briew ba la tip kyrteng kum u Mortonjune Kharbani uba la don kumba 45 haduh 50 snem rta.

Kane ka lanot la ong ba ka la shah leh beijot la bun bun sien ha u snem 2017 ha la ka jong ka iingsah katba ka dang don marwei ha la iing. Hadien kane, la rejistar case hapoh kyndon ain jong ka IPC bad POCSO Act bad la sdang ban pynlong ia ka jingtohkit da ka WPSI Larisha Kharjana.

Ha ka jingtohkit la lap ba kane ka lanot ka la ngat ruh ha ka jingshah leh beijot ha uwei pat uba la shah kynnoh donkti ia uba la tip kyrteng kum u Lumding Syiemlieh. Hadien ba la pyndep ia ka jingtohkit la buh jingthoh ia ki kam sniew kine ki runar (Chargesheet) ia baroh kine ki arngut kiba la shah kynnoh donkti katkum ka CS No. 04/2019 dated 28/01/2019.

Hadien ba la pyndep ia ka jingtian bishar na ka liang ka nongbishar ba kyrpang kashari POCSO East Khasi Hills, Shillong ka Swapna G. Momin, MHJS ka la pynksan halor ka jingdonkti jong kitei ki arngut kiba la shah kynnoh donkti, kata u Mortonjune Kharbani bad u Lumding Syiemlieh bad pynbna ia ka rai pynrem ha ka 27 tarik u Risaw 2023, da kaba set phatok 14 snem kynthih nalor ka kuna kaba T.50,000 marwei.