13 tarik ka Rally pyrshah Coke Factory ki khun ka Elaka Sutnga, rai ujor sha ka Meghalaya High Court

Syllad | The Rising MeghalayaSeptember 10, 2021

Hadien ka jingsngap man man ka sorkar iaka jingud jingnam jong ka Environment Coordination Committee (ECC), Elaka Sutnga haka sngi Thohdieng sa shisien kala rai biang ban mih paidbah sha surok ne public rally ban pynbor ïaka sorkar ban khang khyrdep ïaki karkhana Coke haka 13 tarik Nailur 2021.

Ïa kane ka rai la shim haka jingialang kaba long haka shnong Lamyrsiang, kaba la khot da ka ECC ryngkat bad ka ECC Women Wings bad ki Waheh Shnong ryngkat ki riew rangbah jong ka thain Elaka Sutnga. La iadonlang ki nongmihkhmat naka shnong Narwan bad iaka jingialang la pyniaid da u Chairman jong ka ECC ma DH Malang.

Ka ECC ka khot bad wer ia baroh ki shnong kiba shah ktah na ki tdem Coke Factory, kiba hap hapoh ka East Jaintia Hills District ban mih paidbah ban pyrshah ia ka jingkuman ka Sorkar Jylla ban khang khyrdep ia ki Coke Factory hapoh ka district.

Kane ka rally kan sdang naduh ka por 9:00 Am na madan football jong ka shnong Moopala, nangta kan don ka jingiaiad paitbah na 1 kilo sha ka ophis jong u DC bad yn pynkut ia ka jingiaid Rally haduh ka por 1:00 Pm katkum jingbit bala ka ECC kala ioh na u Deputy Commissioner, East Jaintia Hills

U ma Pynbait Sutnga, general secretary ECC ula ong ba ha kane ka jingialang la iakut ruh ban mudui da ka mukotduma sha ka ïingbishar Meghalaya High Court ban khang shisyndon iaki Coke Factory baroh kiba don haka thain jong ngi namar ba ki jaboh jabain kiba mih na kine ki karkhana kila ktah iaka koit ka khiah u briew bad ka sawdong sawkun ka mariang.

Ka ECC kala kynnoh shuh shuh ba dangshen ka sorkar kala ai consent to operate sa 4 tylli ki karkhana, bad kiba dang ialeh ban ioh CTE (consent to establish) ki don sa 31 tylli na ka Meghalaya Pollution Control Board (MSPCB) bad kine ki karkhana ruh dei kiba la dep lypa ban shna.

Ka ECC kala pynpaw ruh iaka jinglyngngoh ba wat ka JHADC kala leh bymsuidniew iaka jingujor ka ECC, hyrei haduh mynta ka konsil ruh kam don kino kino ki dak ki shin ba kan leh eiei ban pynshitom ia kine ki karkhana.