13 sngi ngat ka Sonam bad uba ieit jong ka u Raj ha judicial custody

Syllad | The Rising MeghalayaJune 21, 2025

Ka Iingkashari haka sngi Saitjain ka la phah noh ia ka Sonam Raghuvanshi lem bad ia uba ieit jong ka u Raj Singh Kushwaha shapoh judicial custody ne phatok na ka bynta 13 sngi hadien ba ka Special Investigation Team (SIT) ka la pyndep ia ka jingtohkit kaba shiphew sngi pyrshah ia ki halor ka jingdonkti ha ka jingjia shah pyniap ba dang shen u kurim jong ka u Raja Raghuvanshi ha Sohra.

“Ia ka Sonam bad u Raj la wanrah mynta ka sngi hakhmat ka Iingkashari hadien ba ka jingtohkit jong ki pulit ka la kut noh. Baroh kine ki arngut kiba donkti halor katei ka jingjia kam pyniap la phah sha judicial custody na ka bynta 13 sngi,” ong u Assistant Public Prosecutor u Tushar Chanda sha ki lad pathai khubor hadien ba la mih na ka Iingkashari Chief Judicial Magistrate (CMJ).

U Chanda u pyntip ruh ba ki pulit ka jylla kim shym la pan jingbit shuh na ka bynta ban tohkit ia kine ki arngut.

“Ki (pulit) ki la shu kyrpad na ka bynta ka judicial custody bad hadien ka jingtian bishar, ka Iingkashari ka la ailad ban set phatok 13 sngi ia baroh kine ki arngut kiba donkti halor katei ka kam pyniap,” u la bynrap.

Katkum ka jingiathuh da u Chanda, na ka liang kiba shah kynnoh ym shym la don kano kano ka jingiarap ha ka liang ka ain ha kane ka jingtian bishar.

Ha ka sngi Palei ba la lah, ia ki laingut kiwei pat kiba donkti ha kane ka kam pyniap, kata u Akash Rajput, u Vishal Singh Chauhan bad u Anand Kurmi la phah set 14 sngi hapoh judicial custody.

Lah ban kdew ba ka SIT ha ka 17 tarik Jylliew ka la lah ban pyndep ha kaba iadei bad ka jingpynwandur biang ia ka jingjia shah pyniap kaba lam ruh sha ka jingioh kurup sa ia kawei pat ka wait ba la pyndonkam ha kane ka kam pyntriem napoh kshaid Weisawdong.