Sniew tasam ka surok Sakhoikuna, dawa maramor mardor ka RBYF

Syllad | The Rising MeghalayaNovember 5, 2024

Ki paidbah nongshong shnong ka thaiñ Sakhoikuna bad kiwei kiwei ki shnong ki la hap ban mad jingeh shikatdei ha ka leit ka wan tang namar ka jingsniew palat liam ka surok ba pyniasoh iaka 20 Mer Pahammawlein sha Sakhoikuna kaba don kumba 7 kilometre.

Na ka liang ki dkhot ka Ri Bhoi Youth Federation (RBYF), Sakhoikuna Unit hadien ba la ioh ia ki jingujor bad ki jingud jingnam na ki paidbah nongleit nongwan, haka 5 tarik Naiwieng kala leit ban jurip ia kane ka surok bad kala lap satang ia ki thliew ki syar bad ki maw kiba la mih na ka jingpdang ka surok rim.

U samla Treilang Maring, President ka RBYF Sakhoikuna Unit, u la iathuh, ba ka seng ka la ioh jingtip, ba ia kane ka surok ha ki por ba mynshwa um da dei than u ba sniew haduh katne lait noh tang ha ki katto katne tylli ki bynta, hynrei dei hadien ka jingtih ban maramot ne siang rong thymmai da u Kontraktor u ba la iehnoh pat khlem pyndep ia ka kam siang rong la katto katne bnai, kane ka surok ka la dap tang da ki thliew bad ki maw ba la pait na ka surok rim.

U la iathuh ruh, ba u Kontraktor ba la shimti ban siang rong thymmai ia kane ka surok u la shu iehnoh khlem pyndep mynta la katto katne bnai kaba la wanrah ia ka jingsyrtok ki paidbah ba leit ba wan na u ne u surok.

Na ka liang ka seng ka kyntu jur ia u Kontraktor ban siang rong pyndep noh mardor ia u ne u surok ban weng ia ki jingeh ba mad da u paidbah, hynrei lada u dang pynjlan ia ka kam ka seng kan hap ban shim pat da ki lad ba kham tyngeh.