10 snem shah rai set phatok 3 ngut kiba thmu leh beijot ia ki khynnah ha Nongpoh

Syllad | The Rising MeghalayaAugust 29, 2025

Ka iingkashari Special Judge (POCSO) ka Ri Bhoi District ka la rai pynrem pyrshah ia ki lai ngut ki runar da kaba set phatok 10 snem namar ka jingdonkti ha kaba thmu leh beijot ia ki lai ngut ki khynnah ha ka jingjia kaba la jia ha u snem 2017.

Kine ki lai ngut ki runar ki dei kiba la tip kyrteng kum u Mawri Ksing, Sbishon Songthiang bad u Bron Prang kiba la shah pynngat kam bymman ha ki kyndon bapher bapher jong ka Indian Penal Code (IPC) bad Protection of Children from Sexual Offences (POCSO) Act.

U Superintendent of Police ka RiBhoi u pyntip ba kane ka case ka dei kaba la register ha Nongpoh Police Station ha u bnai Jylliew 2017, ha kaba ia ka jingtohkit la shimti da ka WP/UBSI E. Khardewsaw.

Hadien ka jingtian bishar katkum ka chargesheet ba la aiti ha ka 23 tarik Risaw 2017, ka iingkashari ka la pynmih ia ka rai pynrem ia kine ki lai ngut ki runar da kaba set phatok 10 snem ha ryngkat ka kunar kaba T.20,000 namar ka jingpyrshang ban leh beijot kynhun (gang rape) ia kine ki khynnah hapoh ka kyndon 376D/511 IPC.

Ka iingkashari ka la rai set phatok ruh 6 bnai namar ka jingrung jubor hapoh iing katkum ka kyndon 448 IPC, bad ka hukum set phatok kaba 2 snem ryngkat ka kuna T.1,000 namar ka jingjrongkti jubor hapoh ka kyndon 354A IPC.

Nalor kata ka Iingkashari ka la rai pynrem ruh da kaba set phatok 6 snem bad ka kuna T.10,000 namar ka jingleh khlem akor kaba palat pud.