10 ngut nongialehkai ka WJDBA kin leit mihkhmat sha ka NE Zone Inter State Badminton C’ships

Syllad | The Rising MeghalayaSeptember 5, 2024

10 ngut ki rang bad thei ialehkai Badminton ka West Jaintia Hills District kin mihkhmat iaka jylla haka lympung ialehkai ‘North East Zone Inter State Badminton Championship 2024’ ka ban long ha nongbah Guwahati naduh 7 tarik haduh 10 tarik Nailur.

Kine ki 10 ngut ki kynthup ia u Mebankerlang Shullai, Deilangwa oo Nongpluh, Gregoreo Passah, Banshanbor Lamare, Lemi Nelson Suchiang, Hunbait S Manner, Salonbhami Suchiang, Lechan Suchiang, ka Nihaka Lamare bad ka Josefina Dala Passah.

Haka kyrdan Senior ki long 4 bad haka kyrdan Under-19 ki long 6 ngut.

Ban ai mynsiem ia kine nongialehkai, ka West Jaintia District Badminton Association (WJDBA) haka janmiet 5 tarik Nailur kala pynlong da ka jingialang kitbok kitwriang bad aibok ai rwiang na ka bynta kane ka jingleit iashim bynta ka jong ki.

U President WJDBA Bah D Pyrbot, Vice President Jlankupar Rymbai, General Secretary Rimilan Passah kila kyntu iaki ban trei shitom bad ban ialehkai bha bad la kitbok kitrwiang ruh ba kin poi shaka thong ban wanrah nam bad burom iaka District bad ka Jylla hi baroh kawei.

Kine ki nongialehkai kin mih lashai ka sngi Thohdieng napoh ka Jylla bad yn ialam da u Manager Prem Joshi, Coach Salrak Marak bad Barisuk Shyrkon.