1 kol pynliem ka Mawlai ia ka Langsning haka Shillong Premier League

Syllad | The Rising MeghalayaAugust 30, 2025

Ka kynhun ialehkai ka Mawlai SC ka la lah ba kan pynliem tnoit da 1-0, pyrshah ia ka Langsning FC, ha ka lympung ialehkai jong ka Shillong Premier League, kaba la long haka 29 tarik Nailar ha SSA Stadium, First Ground, Polo.

Ia kane ka shi kol naka bynta ka Mawlai SC, la thep ia ka da u Banraplang Pyngrope ha ka minit kaba 52, ha kaba u la ioh ban head ia ka bol kaba wan lyngba ka corner.

Ha ka jingshisha, ka Mawlai SC ha kane ka jingiakhun, lah ban ong ba ka la ioh bun bha ki kabu ksiar ban pynkhih ia ka jar, khamtam lei lei ha ka kylla step, kaba lada shim kaba duna eh ki long lai tylli.

Da kane ka jingjop ka Mawlai SC joit kala kiew mynta sha ka kyrdan kaba ar hadien ba ka la ioh ba kan khur 6 point, katba na ka liang ka kynhun ialehkai ka Langsning FC, kane kan dei ka namrem ba nyngkong ba kan mad ha kane ka samoi ialehkai kaba mynta jong ka SPL, bad hiar mynta sha ka kyrdan kaba saw.

Ka kylla step ka long ba baroh ar kynhun ki la sdang ban ia pyni ia la ka jong ka buit bad ka bor ialehkai ka jong ki, ha kaba ki kabu ksiar ban thep ia ka kol, ki la sdang ba kin mihpaw, bad ha ka minit kaba 17, u Loving Suting u la lah ban khyrwit jam bha kham na jngai ka bol kaba la pynlong ia u rang ap kol ka Langsning u Rajat Paul ban kham trei shitom ban khanglad ia kane ka bol ba kan ksam lyngba ia u.

Hadien kane, u Brolington Warlarpih, uba la ioh ban sdang nyngkong eh bad la ka kynhun naduh kaba sdang, u la khyrwit ia ka freekick kaba shu lait salit ban pynkhih ia ka jar.

Katba na ka liang ka Langsning, u Apborlang Kurbah, u la lah ban khanglad ia ka Mawlai ban ioh pynkhih ia ka jar hadien ba u la ioh ban da kaba u la ioh ban head noh shabar ia ka bol.

Haba wan ban bteng ia ka kylla miet, ka kynhun ialehkai ka Mawlai SC, ka iai pynpaw ia katta ka jingthrang bad sliang ka jong ka ban jop ia kane ka jingiakhun, kaba la pynkhih win hi puk ia ka kut ialehkai jong ka Langsning, bad ha kum kane ka por, u Robertson Khongriah u la shut ia ka corner ha kaba I kumba u la da thew matang kyrpang bad ka bol ka la poi hajan u Banraplang uba la ioh ban pyndei tiak dala ka jong ka khlieh bad ir ban pynkhih ia ka jar kham na kyndong jong ka kol.

Hadien kane u Chusrang Sangma uba tbit bad khlain bha ban throw ia ka bol, u la pyrshang katba lah ban plie lad ia ka kynhun ban lah ban wanphai sha ka jingiakhun, hynrei, ka jingskhem palat ki rang ka Mawlai SC, ka la khanglad lut ia ka kynhun ialehkai jong ka Langsning FC ba kan da hap ba kan pdiang ia kane ka namrem.

Ha kane ka kynti jong ka jingiakhun, u referee u bah Lightstar Kharduit, u la  ailad ia ka Langsning ba kan shut ia ka corner, kaba la wan hadien ba u rang ap kol ka Mawlai SC, u la bat kham slem ia ka bol ha la ki kti palat ia ka 8 sekon, kaba dei artad ka rule thymmai kaba la pyntreikam.

Ka jingiakhun kaban wan jong kane ka lympung kan long tad haduh ka sngi Nyngkong (1 tarik Nailur), ha kaba ka jingiakhun kan long hapdeng ka Rangdajied United FC pyrshah ia ka Nongrim Hills SC kaban long ha ka por 4:30 janmiet.