Yn leit ai mynsiem ka KSU ia ki paradoh ha Lapangap hadien ka jingiakynad bad ki Karbi

Syllad | The Rising MeghalayaSeptember 27, 2023

Ka Khasi Students’ Union (KSU) Central Body ka pyntip ba ki dkhot jong ka KSU-WJH Unit kin hiar sha ka shnong Lapangap ban ai mynsiem bad jingkyrshan ia ki paradoh parasnam kiba shah pyntyrha ha ki paid Karbi kiba la kam jubor ia ki lyngkha kba jong ki nongshong shnong kiba dei ki Khasi Pnar.

Ka KSU ha u kyrwoh lyngba u General Secretary kala ong ba ki paid Khasi Pnar kumba ju long naduh ki por hyndai hynthai ki ju rep ju riang ha la ki jaka kiba kham pajih na la ki shnong ki thaw. Kumjuh ruh ha Lapangap ki paid Khasi ki sah ha ki shnong hynrei ki jaka rep ba long nongkynti ma ki ki ju don sha pajih, kata kum sha pdeng khlaw. Pynban ki Karbi ki la shim kabu da kaba kam ba ki lyngkha kba jong ki Khasi Pnar ki hap hapoh u pud u sam jong ka Assam.

“Mynshwa ha ka por ba ki Khasi Pnar ki leit rep kba, ym don ba pyndik hynrei da la dei ka por ban ot ia u kba, ki paidbhur Karbi ki la siat da ki jri bad ki khnam ia ki nongrep kiba dei ki paradoh parasnam,” ong ka KSU.

Na ka liang ka Seng ka ai ruh ka jingiaroh ia ki nongshong shnong ka Lapangap kiba ieng rangbah ban iada ia la u pud u sam bad ka kyntu ia ki bor sorkar ka Meghalaya ba ki dei ban ai jingiada mardor bad ban synran ia ki nongrep Khasi Pnar ba kin ioh ban leit ot ia u kba ba ki la rep shitom.

Shuh shuh ka Seng ka la ong ruh ba kan iai don ryngkat bad ki paid Khasi Pnar kiba sah ha Lapangap bad kiwei kiwei ki bynta jong ka thain khappud Meghalaya-Assam bad ka Seng kan ym ai ailad wat tang shi inshi ruh ka khyndew ka shyiap jong ka Bri u Hynñiewtrep ba kan tuid noh sha Assam.

Ha kajuh ka por ka KSU ka kyntu ia ki paid Karbi bad ki bor sorkar Assam ban long kiba adkar bad ban ym pyndik ia ki paid Khasi kiba leit sha la ki lyngkha namar ka Seng kam kwah ia ka jingiakynad hapdeng ki para riewlum hynrei kam lah ruh ban shu peit haba ki paradoh parasnam kin ngat ha ka jingshah thombor na ka por sha ka por.

Siat tear gas ki pulit Assam ban pynpra ia ki paidbah Pnar hadien ba nangkhluit ka jingialeh bad ki Karbi, shah thang 2 ki iingtrep

“Ka Shnong Lapangap, Mukroh, Khanduli, Langpih, Sabuda, Umwang, Moolber, Moojem, Psiar, Khatkasla bad kiwei kiwei ki shnong Khasi ki hap hapoh ka Meghalaya bad ka KAAC bad sorkar Assam kim dei ban kam trai ia ki,” ka la ong shuh shuh.