U Nidamon Chulet u dei u suba donkti ym u nongsakhi: High Court

Syllad | The Rising MeghalayaFebruary 26, 2019

SHILLONG: Ka High Court jong ka Jylla Meghalaya ka la hukum ia ka tnat pulit ba kam dei ban khein ia u Nidamon Chulet kum u sakhi hynrei u dei ban iaineh kum uwei na kiba shah mudui ne u accused bad ka Iingbishar ka la buh ia ka tarik ban shim jingbishar hadien lai taiew.

Ia kane ka hukum la pynmih da ka Court haba  shim bishar ia ka mukotduma writ petition  (Civil) kaba 433 jong u snem 2018  bala ujor da ka Amita Sangma bad kiwei pyrshah ia ka Central Bureau of Investigation (CBI).

Kumba yn shu pynkynmaw, ka Kong Agnes Kharshiing kaba long ka President jong ka CSWO (A) ryngkat bad ka Amita Sangma ki la shah shoh ha ki snar khaii tuh dewiong ne ki coal mafia kiba pynkhein ia ka hukum ka NGT bad ka Supreme Court ha ka 8.11.2018 ha Tuber Shohshrieh hapoh Lad Rymbai Outpost haduh ba ka Kong Agnes ka la mynsaw jur bha.  Ki pulit jong ka East Jaintia Hills ki la ujor FIR pyrshah ia ki riew runar kiba la shoh ia ka Kong Agnes bad ka Amita.

Ka Amita Sangma na ka daw ka jingsngew artatien ia ka jingtohkit ka tnat pulit ka la dawa ia ka jingtohkit da ka CBI na ka Sorkar Jylla hynrei na ka daw ka jingbym sngap jong ka Sorkar, ka Amita ka ujor da ka mukotduma pyrshah ia ka CBI ban dawa ia ka jingtohkit  da ka CBI.

Katba ka Iingbishar ha East Jaiñtia Hills District ka dang pynlong ia ka jingshim bishar halor katei ka jingjia.

Shwa ba ka Iingbishar kan pynmih ia katei ka hukum, u Investigating Officer ne u ophisar ba tohkit ia kane ka case u la ai ka jingpynshai halor balei u la shim ia ka jingphla ne statement jong u Nidamon Chulet katkum ka Section 161  bad Section 164 Criminal Procedure Code (CrPC).

Shuh shuh u nongiasaid jong ka Sorkar Jylla ula iathuh ba ka tnat pulit ka la jan pyndep ia ka jingtohkit jong ka bad sa ai ia ka kaiphod kaba khatduh katkum ka Section 173 Cr.PC ha khmat ka Iingbishar ba dei khmih ia kane case hadien ba ka tnat pulit kan ioh pdiang ia ki kaiphod halor tower location bad ki call record bad ki kaiphod na ka tnat Forensic bad kine ki la ban shim por haduh lai taiew.