T.75,000 klur yn bei tyngka u Mukesh Ambani ha ka thain North East ha kine ki san snem ban wan

Syllad | The Rising MeghalayaMay 25, 2025

U Chairman & Managing Director ka Reliance Industries Limited, u Mukesh D. Ambani, u la ïashim bynta ha ka jingïalang bah jong ki nongbei pisa tyngka – “Rising North East Investors Summit, 2025,” ha ka 23 tarik Jymmang

U Mukesh u la sdang ïa ka jingkren da kaba ai khublei ïa u Mantri Rangbahduh ka ri, u Narendra Modi nalor kiwei kiwei ki heh ki haiñ bad kiba donlang ha kaba u la ai ka jingïaroh ïa u Modi halor ka jingjop ka ïakhun ïa ki kam pyntriem lyngba ka “Operation Sindoor.” Kane ka jingjop ka dei ka sakhi kaba phalang halor ka jingkut jingmut kaba skhem bad ka jingshlur ka bym lah ïanujor jong ki bor pahara jong ka ri.

U la ai khublei ruh ïa u Myntri Sorkar, u Jyotiraditya Scindia namar kane rynsan ka ban wanrah jingkylla. Ki 8 tylli ki Jylla ha ka Thaiñ Shatei Lammihngi (North East) la khot kum ka ASHTA LAKSHMI. U la ong ba kane ka thain kam dei tang ba kan nangkiew, hynrei ha ka jingpyrkhat jong nga, kan sa kyrhuh.

“Ha ki por ban sa wan, nga lah ban ïohi shai bad kane ka Thaiñ ka bud ïa ki kam bah kiba la lah ban pynpoi sha ka thong da ki ri ba marjan kum ka Singapore, Malaysia bad Vietnam. Na ka bynta ka Reliance, ka dei kaei kaei ka bynta jong ka burom ban pynurlong ïa ki jingphohsniew jong kane ka Thaiñ kaba don ha bynta ba kiew sted ha ka ïoh ka kot lyngba ki nongshong shnong kiba dang samla ha ka ri,” ong u Ambani.

U la ong, “Mynta nga buh 6 tylli ki jingkular sha baroh ki Myntri Rangbah na kane ka Thaiñ, Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura. Kaba nyngkong, ka Reliance ka dep bei kumba T. 30,000 klur ha kane ka thaiñ ha kine ki 40 snem ba la leit. Ha kine ki 5 snem ban wan, ngin bei arshah da ka thong ban pynpoi sha ka T. 75,000 klur.Nalor ka jingplie ki lad ai kam palat 2.5 million, ngi angnud ban leh ei ei ka ban myntoi ïa ki jingim jong ki 45 million ki para kynthei bad shynrang jong ngi na kane ka Thaiñ (North East).”

“Ka ba-ar, ka Jio ka la lah ban poi sha kumba 90 na ka 100 ki nongshong shnong ha kaba ki la don palat 5 million kiba  pynïasoh ban pyndonkam 5G (5G subscribers). Ngin sa leh arshah ïa kane mynta u snem.Kaba hakhmat eh ka Jio kan wanrah ka bor ka jingkylla ha ka liang ka bor jingstad kaba la thaw lypa (Artificial Intelligence) sha baroh ki skul, ki hospital, ki kam bapher bapher bad ha ki ïing ki sem. Haba ki sap ki ïashem bad ki kor jingstad bad ka jinglah ka ïakynduh bad ka jingpynïasoh, ka Thaiñ Shatei Lammiihngi jong ngi kan kiew kham shakhmat.”

Kaba lai u la ong ka Reliance Retail kan kham pynbun haba kaba thied ïa ki jingbam, ki soh bad ki jhur ban kyntiew ïa ka jingïoh kamai ki nongrep jong ngi.Ngin sa bei pisa ban buh ki karkhana ki ban pynmih ki tiar FMCG kiba bha ha kane ka thaiñ bad kyntiew ruh ïa ka ïoh ka kot ha ki kam thaiñ jingthaiñ kiba itynnad.

Ka basaw ka long ban kham pynkhlaiñ ïa ka jingpynmih bording na ka sngi ha kane ka thaiñ.U Myntri Rangbahduh jong ngi borabor u ju kren ban pynkylla ïa ki jaboh jabaiñ sha ka spah. Ha kane ka bynta, ngin sa pynkylla ïa ki jaka shrah sha ki jaka pynïoh spah da kaba buh 350 tylli ki Compressed Biogas Plant.

Ka basan, ka Reliance Foundation kan wanrah ka jaka sumar kaba bha tam ïa ka jingpang bampong ha ka Thaiñ Shatei Lam Mihngi. Kum ka jingsdang, ngi la tei ïa ka jaka sumar bampong kaba 150 jingthiah ha Manipur. Ngi ïatreilang ruh bad ka skulbah ha Mizoram (Mizoram University) ban sumar ïa ka bampong da kaba pyndonkam ïa ki jingtip katkum ki tynrai jingtreikam ki dkhot met (genomic data).

“Ha Guwahati, ngi la tei ïa ka Advanced Molecular Diagnostics & Research Lab kaba dei kawei napdeng ki jaka sumar kaba heh ha kaba ïadei bad ka Genome Sequencing Capacities ha India. Ngin ïarap ban pynlong ïa ka Thaiñ Shatei Lam Mihngi kum ka jaka pdeng ha ki lad ai jingsumar bad kum ka jaka kaba khlaiñ ha ka rukkm wad bniah,” ong u Ambani.

Ka ba hynriew pat ka long ba ka Thaiñ Shatei Lam Mihngi ka dei ka ïing shong jong ki sap bapaw ha pyrthei ha ki kam ïalehkai kiba bun jait.Ka Reliance Foundation kan trei rhngkat bad baroh 8 tylli ki jylla ha kane ka thaiñ ban buh ïa ki Olympic Training Centre ki ban long ki shlem ai jinghikai ban pynkhreh ïa ki samla jong ngi ki ban long ki nongjop bad wanrah ki takma ha ka jingïalehkai Olympics.

U Mukesh u la ïaroh ïa u Myntri Rangbahduh da kaba ong ba u la lah ban pynpoi sha ka thong ïa kaei kaei kaba ym lah ngeit bad ym lah mutdur bad wanrah ïa ka Thaiñ Shatei Lammihngi sha ka pdeng jong ka map ka India ha ki kam pynroi bad ki pynsawa ki khana ha ki bynta ba hapdeng jong ka India.

“Hapoh ka jingïalam jong phi, ngi kiba don ha ki kam karkhana ngin ïatrei bad baroh ki Myntri Rangbah ban pynlong ïa ka Thaiñ Shatei Lam Mihngi kum ka nuksa ka ban ai mhnsiem bad pyni sha kiwei pat ki bynta ka pyrthei, kumno ba ngin lah ban kiew shaphrang; kumno ki kam pynroi ki ïaid ryngkat ban sumar ïa ka ei mariang; kumno ka mei longspah bad ka roi ka kiew kan poi sha baroh ki longïing bad kumno ka mei India ka kdup ïa baroh ki khun jong ka da ka jingieid bym don u pud,”  u la bynrap.