Sngewlem ka KSU halor ka jingshah pyniap u rangbah na Umkiang haki suba nong Bangladesh

Syllad | The Rising MeghalayaJanuary 7, 2024

Na ka liang jong ka KSU Narpuh Circle ka phah ia ka kyrwoh jingsngewlem sha kiba ha ïing ha sem bad jingsngewsynei sha u (L) Chiang Dhar na ka shnong Umkiang Elaka Narpuh uba la shah pyniap dusmon ha ki suba khar Bangladesh ha ka tarik 6 mynta u bnai Kyllalyngkot (January) 2024 kumba ha ka por 3:30 PM.

Ka KSU kala ong ba katkum ka jingiathuh jong ki trai shnong, kine ki arngut ki trai shnong kata u Bah Chiang Dhar na Umkiang bad u Rahul Pohtam na Lumsoski ki la leit sha bri kwai ban ap ioh don ki khar Bangladesh kiba wan tuh kwai, hynrei kitei ki arngut ki la shah kthong ha ki khar Bangladesh kiba wan da ka kynhun ha kaba u Rahul Pohtam u la lait im bad u Chiang Dhar u la shah pom dusmon da ki wait bad u la khlad.

Ka Seng KSU kala ong ba kane ka jingjia ka la jia ha jan ktem jong ki shipai BSF kaba kyrteng Lamasaki kaba jngai tang 500-meter na katei ka jaka ba jia.

“Kane ka jingjia ka la pynsuhjer ia paradoh parasnam jong kito ki thaiñ namar kum kine ki jingjia jingshah thombor ki jia na ka por sha ka por ha kaba lah ban pynkynmaw ba dang ha kine ki khyndiat bnai ka lah jia ka jingshah pyniap dusmon kawei ka longkmie kaba la 45 snem kaba na ka shnong Donaskur ka shah pyniap ha u khar Bangladesh ha kaba na liang ka tnat pulit kim shymla ioh kem haduh mynta,” ong u kyrwoh ka KSU.

Shah pyniap dusmon u rangbah, lait thaw uwei ha ka kynhun runar ha khappud India Bangladesh

Ka seng KSU ka pynrem jur ia katei ka jingleh riew khlaw kaba shim ia ki mynsiew briew. Ka seng KSU ka dawa na ka sorkar jylla ban register case ia baroh kitei ki riew thrang snam bad phah pynkynriah noh ia ki BSF kiba shong beaiñ ha jingkieng Sonapyrdi bad kito kiba shna ktem ha mar khap shnong Dona bad Ratacherra sha khappud. Ka KSU kala dawa ban phah pahara iaki shipai BSF sha khappud ym ban shong ha highway ban ioh leh tohmet ia ki paradoh parasnam.

Ka sorkar jylla ka dei ban shimkhia ban iada ia kum kine ki jingshah thombor ki paradoh parasnam jong ngi na ka por sha ka por kam dei ban shu sngap jar, ong u kyrwoh ka seng KSU

Shah pyniap dusmon ka longkmie ha ki suba khar Bangla, hiar kyrkieh ka KSU Narpuh sha ka shnong Donaskur