Sdang U 5 Kur 11 Kur ia ka jinglehniam ka Raid Mylliem Hima Mylliem

Syllad | The Rising MeghalayaMay 25, 2025

Ka leh niam ka Raid Mylliem da U 5 Kur 11 Kur ha ryngkat ki khun ki hajar ka Raid Mylliem kaba ju pynlong ha u bnai Rymphang man la u snem naduh ki por barim bajah da ki longshwa manshwa ka la sdang ha ka 24 bad kan kut ha ka 29 tarik Jymmang 2025.

Ia kane ka jingleh niam la ju sdang na Mawnarian ha ki arsngi bad bud pat ka shisngi ha Lum Shulong ha ka sngi kaba lai, nangta bud sa ka shad niam ba lai sngi kynthih hadien ba la dep ka niam na Lum Shulong.

Kane ka dei ka jingleh niam kaba kyrpang bad kyntang ha ka Raid Mylliem na ka bynta ban ainguh ia la U Blei Kynrad halor ka jingkyrkhu jong U ban da ban ker ki Lei Ryngkew Basa ia ki Khun ki hajar ka It ka Hima ban biang ban bit ha ka imlang sahlang ha baroh ki liang, ka synshar khadar kaba suk ba sain naduh Bisi haduh Bhoi Rymbong.

Mynta u snem da ka jingshim khia u Lyngdoh bakhlieh ia ka Raid lem bad u Myntri Syngteng Nongdhar bad u 5 kur ba shong lyngknot na ki khun ki hajar kiba don ka jingkit khlieh, ki la shim ia ka  Lyngkor ban leh ban pyndep ia ka niam raid hadien ba ki katto katne ki myntri badei ban leh ia ka niam kim shym la lah ban leh mynta u snem ia ka niam kumba ju dei ban long man la u snem hapoh ka Raid Mylliem kaba dei ka bynta ba kongsan hapoh ka synshar niam jong ka raid.