Pynlong ka RC Jowai da ka International Fellowship Meet

Syllad | The Rising MeghalayaApril 29, 2023

Ban wanrah ïaka jingsngew ïajan haka rukom treikam jong ka Rotary International, ka Rotary Club Jowai haka sngi Thohdieng kala pynlong ka jingïakynduh lang ba kyrpang bad ki para Rotarian na ka Rotary Club Mahanagar RID-3282 Sylhet jong ka ri Bangladesh.

Ïaka jingïakynduh lang ka pynlong ha Orchid Inn Thadlaskeiñ haka jingdonlang ka Chartered President Rotary Club Jowai Rtn. E.F.Gatphoh haka jingïalang ba la pynïaid da u Rtn. Samehi Laloo, President Rotary Club Jowai bad ki kyntien pdiang burom na u Rtn. Rudolf E Laloo.

U Rtn. SK Lato, (MPHF) Director Community Service ula kren halor ka jingïadei hapdeng ka Ri Jaintia bad ka Ri Bangladesh ha ki por ka jingsynchar jong ki Syiem Jaintia bad ula ong kumba ka jingthmu jong kane ka jingïalang ka long ban wanrah ïaka rukom treikam kaba ïajan kumta ula khot ka jingiatreilang ba bynta ka bha ka miat jong ka imlang sahlang khnang ba kane ka jingïakynduh lang kan suhthied na ka por sha ka por.

U Rtn. Sayed Ashraf, Adviser Rotary Club Mahnagar-Sylhet haka jingkren ula ïaroh ïaka Rotary Club Jowai bad ki dkhot kiba la pdiang sngewbha ïaki haka jingwan ïuhkjat ha Jowai.

Ula ong ba ka long kaba donkam ban wad ki lad ki lynti ban leh ïaki kam ba bha haka imlang sahlang, ka lah ban long ka kam shisngi ne da kiwei kiwei kiba lah ban pynsah nam sah kynmaw hapdeng ka Rotary Club Jowai bad ka Rotary Club Mahnagar-Sylhet jong ka ri Bangladesh.

Ïaka jingkynduh lang la pynkut da ki kyntien khublei na u Rtn. J.M.Pohsngap.