Pynkylla ka Sorkar ia ka jingtreikam ka MPSC da kaba thaw ia ki recruitment board 

Syllad | The Rising MeghalayaDecember 6, 2023

U Myntri Rangbah ka jylla u Conrad K Sangma haka 5 tarik Nohprah, u la ong ba na ka liang ka sorkar ka la pynthymmai ia ki rukom treikam jong ka Tnat Meghalaya Public Service Commission (MPSC) bad ia baroh ki bynta kiba iadei bad ka thungkam thungjam da kaba thaw shuh shuh ia ki recruitment board khnang ban pynkloi ha ka liang ka thungkam thungjam.

Haba kren sha ki lad pathai khubor, u Sangma u la ong, “Ngi la pynthymmai ia ki rukom treikam jong ka MPSC bad ia ka rukom thungkam da kaba thaw shuh shuh ia ki board ki ban iarap ban kham pynkloi ha ka liang ka thungkam thungjam.

Hadien ka jingmih jong ka health recruitment board, ka jingthungkam ha kaba iadei bad ki doktor kaba la sahteng lah san snem kynthih la lah ban pyndep tang hapoh ka lai bnai hadien ba la thaw ia ka health board kaba thymmai.”

U Conrad u la ong ruh ba ka jingthmu jong kane ka long ban pynthikna ba ka jingpynrung kam kan long kaba iaid beit iaid ryntih, bad ka jingthaw ia ki board bapher bapher kan plielad mardor ha kaba pyntreikam bad ka jingthungkam bad dei na kata ka daw kaei kaba ngi leh ka long shibynta jong ki jingkylla.

Nalor kata u la ong ruh ba ki don katto katne ki skul sorkar, ki higher secondary school kiba hap ban thung ia ki principal, hynrei kane ka kam ka la sahkut haduh san snem kynthih bad na ka liang ka MPSC ka la ban khia shibun, bad kumta ban pynthikna ba kan ym don ka jingpynslem ha ka jingthungkam ngi la sdang ia ka board kaba thymmai ban pynkylla ia ki jingtreikam ha ka liang ka thungkam thungjam.