Pan kaiphod ka iingbishar na ka Sorkar halor ka jingtyrwa pynbun ia ki lum jingtep

Syllad | The Rising MeghalayaMay 10, 2025

Ka iingbishar Meghalaya High Court ha ka 8 tarik Jymmang ka la bthah ia ka sorkar Jylla ba kan aiti ia ka kaiphod kaba pynpaw ba ka la don ne em kano kano ka jingtyrwa ban kyntiew ia ka jingdon jong ki lum jingtep na ka bynta ki riewngeit Balang Khristan.

Ka iingbishar kaba kynthup ia u Chief Justice IP Mukerji bad u Justice W Diengdoh ka la ong, “La bthah ruh ia ka sorkar Jylla ba kan file ia ka kaiphod ban pynpaw la ka don ne em kano kano ka jingtyrwa ban kyntiew ia ka jingdon jong ki lum jingtep na ka bynta ki riewngeit jong ki Balang Khristan.”

Ka iingbishar haba pynsngew ia ka jingbishar halor ka PIL kaba iadei bad ka jingthang ia ki metiap jong ki briew kiba dei ki nongshong shnong Khasi bad Jaintia kumjuh kito kiba ngeit ha ka niam Hindu hapoh ka Jylla, ka la rai ban pyniar bad kynthup ia ki nongshong shnong kiba dei ki Khristan hadien ba la shim ia ka judicial notice halor ki jingtip ba kiba bun na ki kynhun Balang Khristan ruh ki ngat ia kajuh ka jingeh ha kaba iadei bad ka jingpyndep ia ki jingtep ia ki metiap ha ki lum jingtep.

“Ki lum jingtep ba la pyniaid da kawei ka Balang kam shah satia ban tep ia ki metiap jong ki briew kiba dei na kiwei pat ki kynhun Balang. Ka jingmih na kane ka long ba ha kiba bun ki thain jong ka Jylla ki dkhot jong ki longiing kiba khlad ki hap ban mad ia ka jingeh namar ki hap ban iaid ia ka lynti kaba jngai na ka bynta ban pyndep ia ka jingleh niam ba khatduh ia kiba iap. Ka long ruh kaba donkam na ka bynta ban ia pyndonkam lang ia ki lum jingtep bad ban ai jaka ban pynlong kum ka jaka tep na ka bynta ki riewngeit Khristan,” ka la ong.

Ka Iingkashari ka la bthah ruh ia u Amicus Curiae N Syngkon ban pynlong ia kiba kum ki juh ki jingialang bad ki District Magistrate lem bad ki dkhot na ki nongshong shnong ban pynbeit ia ia kane ka jingeh kaba ki riewngeit Khristan ki iakynduh bad ban aiti ia ka kaiphod.

“Kumba ka long mynta, ngi la bthah ia u Amicus Curiae ba ngi la thung ban pynlong ia ki jingialang bad ki District Magistrate lem bad ki nongmihkhmat na ki kynhun Balang bapher bapher ban ia pynbeit halor kane ka kam kynthup halor ka jingpyndonkam lang ia ki jaka thang briew.”

Ha ka hukum ba la pynmih ha ka 8 tarik Iaiong, ka iingbishar ka la kdew ia ka jingtyrwa jong ka sorkar ban shna ia ki jaka thang briew kiba thymmai ha ki thain bapher bapher ka Jylla, hynrei kane kan dang shim por.

Ka Amicus Curiae ula ai ruh ia ka kaiphod haka jingshong bishar bad pyntip ba hadien ba la pynlong ia ki jingialang, la shem ia ka lad ba ki dkhot jong ka jaitbynriew Khasi bad Jaintia kin iasam ia kawei ka jaka thang briew da kaba iasuk bad ki para Hindu jong ki da kaba ai ia ki bynta ba kyrpang jong kawei ka jaka thang briew sha kawei pa kawei na kine ki jaitbynriew bad da kaba ai ia ka hok jong kawei pa kawei ka jaitbynriew ban tei ia ka jaka thang briew ban thang ia kiba iap.

Ha kajuh ka por ka Iingkashari ka la pyndon bynta ruh ia baroh ki laitylli ki Autonomous District Council, ka Khasi Hills Autonomous District Council, Jaintia Hills Autonomous District Council bad Garo Hills Autonomous District Council.