Lum jingialang CM Conrad ban bishar bad pynkhreh ia ka jingwan ka aiom slap

Syllad | The Rising MeghalayaMay 3, 2025

U Myntri Rangbah ka Jylla u Conrad K Sangma haka 2 tarik Jymmang u la khot pynlong ia ka jingialang bad ka State Disaster Management Authority (SDMA) lem bad kiwei pat ki Tnad ba don bynta ban khmih bad bishar bniah halor ka jingpynkhreh ka Jylla ia ka jingwan jong ka aiom slap.

Ha kane ka jingialang la ia don lang ruh u Symbud Myntri Rangbah ka Jylla u Bah Prestone Tynsong, Myntri ka Tnad ka koit ka khiah ka Kong Ampareen Lyngdoh, Chief Secretary Bah DP Wahlang lem bad ki heh ophisar na ka IMD, PHE, Health, PWD, Power bad kiwei kiwei.

Na ka liang ki Deputy Commissioner bad ki ophisar na baroh ki District ka Jylla ruh kila wan iashim bynta lang ha kane ka jingialang lyngba ka video conferencing.

U CM haba lum jingtip halor ki jingpynkhreh ka jylla ia ka jingwan ka aiom slap u la ong ba ka jingiatreilang hapdeng ki Tnad bad kynhun bapher bapher ki long kiba kongsan ha ka jingpynkhreh ia ki plan ym tang ban pynduna ia ki jingshah ktah hynrei ban pynduna ia ka jingpynkloi ha ki kam aijingiarap khnang ban pynduna ia ki jingduh bad ki jingeh bad ban wanrah biang ia ka jinglong jingman kumba ju long. U la bynrap ba ki kam aijingiarap kum ka jingpynbiang um bad ki jaka sah ka dei ban long kaba mardor haba don kino kino ki jingjia.

Haba ban jur halor ka kamram bad ka jingdon bynta jong ka Block Disaster Management Committee (BDMC), ki Village Disaster Managements Committees bad Village Executive Committees, u Conrad u la bthah ia ki Deputy Commissioner ban pynlong man ka por ia ki jingialang bad bynrap ba dei ruh ban ai ia ki jingbthah bad ia ki jingkdew ia ki kyndon treikam sha ki kynhun seng kiba don ha ki shnong ki thaw.

U CM u la bthah ruh halor ki jingdonkam ban pynphriang ia ki jingtip sha ki paidbah ha ki shnong ki thaw ha ka rukom kaba dei lyngba ki lad pathai khubor bad da ki ktien jong ki trai shnong.

Nalor kata u pyntip ruh halor ki sienjam ba la shim da ka sorkar ban pynjanai ia ki lad aijingtip lypa bad ong, “Baroh ki thain ki don ha la ki jong ki rukom shah ktah na ki jingjia shah lynshop ha ki bor ka mariang bad na ka liang ka sorkar ka la shim ia baroh ki sienjam ban map ia ki kum ki jingjia shlei um ha Rilum Garo bad ki jingjia twa khyndew ha Rilum Jaintia  bad ban wanrah ia ki kor ki bor kiba lah ban batai lypa shwa ban don kano kano ka jingjia.”

Kumjuh u CM u la khmih bniah ruh halor ka jingpynbiang ia ki briew ki ban pyntrei ia ki kam, ki tiar ki tar/ki kor ki bor kum ki kali puh shilum, ki lieng bad kiwei kiwei. U la ong ruh ba ka surok, ka um bad ka bording ki dei ki bynta kiba kongsan kiba ju shah ktah jur ha ki jingjia shah lynshop ha ki bor mariang bad u la bthah ban phaikhmat bha sha kine ki bynta.

Shuh shuh u la ong ba ia ki mock drill dei ban pynlong man la ka por namar ka jingpynlong ba khah khah kan iarap ban pynsngewthuh ia ki paidbah ba kin long kiba la pynkhreh.