Leit jurip ka DREAM ia ka jingtei ban pynlong kum ka Rehab Centre ha Nongstoin

Syllad | The Rising MeghalayaJune 5, 2025

Ha ka sienjam kaba kongsan kaba thmu ban pynkhlain ia ki lad iakhun pyrshah drok, u Mission Director ka Director of the Drug Reduction Elimination and Action Mission (DREAM), u Bah FG Kharshiing ha ryngkat u MLA ka Nongstoin u Bah Gabriel Wahlang haka 4 tarik Jylliew ki la pynlong ka jingleit jurip ia ka jingtei jong ka sorkar ha Upper New Nongstoin ban pynlong kum ka jaka aijingsumar ne ka Rehabilitation Centre na ka bynta kito kiba kyrni ha u drok.

Ha kane ka jingleit jurip ba la ialam da u Mission Director la synran lang ruh da u Deputy Commissioner ka West Khasi Hills, ki ophisar na ka tnad District Social Welfare, District Agriculture, ki dkhot ka Urban Mission, New Nongstoin Presbyterian Church bad ki nongialam Shnong.

Kane ka jingleit jurip ka long ban bishar bniah ia ka jinglah ban shna bad pynbiang ia ka jaka ba la ithuh na ka bynta ban pynlong kum ka jaka sumar ne rahab centre hapoh ka thain. Kane ka jingthmu ka la sakhi ruh ia ka jingkyrshan kaba pura bad ka jingai mynsiem kaba khlain na baroh kiba don bynta lang, kaba pynpaw ia ka jingkut jingmut lang ban rat dyngkhong ia u drok na ka imlang sahlang bad ka jylla hi baroh kawei.

Haba kren ha kane ka sngi, u MLA ka thain u Bah Gabriel Wahlang u la u la ai ka jingiaroh ia ka sienjam ba la shim da ka Urban Mission bad DREAM na ka bynta ban don ia ka jaka ai jingsumar ne ka rehab centre ba kongsan hapoh kane ka thain khnang ban lah ban iakhun pyrshah ia ka jingjyllei jong u drok.

U la ban jur ruh halor ka jingkongsan jong ka jingiatreilang ban iakhun pyrshah ia une u jait jingdih ba shyrkhei bad pynpaw ruh ka jingkyrmen ba kane ka jaka sumar kan pynioh ia ka jingpynkhiah bad pynkylla pat ia ka jingim hapdeng kito kiba la kyrni ha u drok.

Kane ka jingthmu kalong shibynta ka thong jong ka DREAM ban pynioh iaka jingshakri kaba jan bad ban pynthikna ba baroh kin ioh ia ka lad ban phah sumar hapoh ka district.