Lahduh ka East Khasi Hills ha ka iakop siat suloi ba la pynlong da ka SAM

Syllad | The Rising MeghalayaJuly 6, 2024

Ka Shooting Association of Meghalaya (SAM) ryngkat  ka jingiatreilang bad ka tnad  Directorate of Sports & Youth Affairs ka sorkar Jylla ki la lah ban pynlong ia ka jingiakop siat suloi “9th Meghalays State Shooting Championship 2024” kaba la sdang naduh ka 26 haduh ka 30 tarik u bnai Jylliew ba la dep ha ka shlem aijinghikai jong ka Assam Regimental Centre ha Happy Valley,Shillong.

Ha kine ki saw sngi jong kane ka jingiakhun, ka kynhun kaba la ioh ba kan rah ia ka nam lahduh dei ka East Khasi Hills District hadien ba ka la ioh ba kan khur haduh 33 tylli ki takma kaba kynthup 9 tylli ki takma ksiar, 9 tylli ki takma rupa bad 15 tylli ki takma rnong.

Katba ka West Garo Hills ka la wan ha ka kyrdan kaba ar da kaba ioh ban khur 4 tylli ki takma ksiar, 6 tylli ki takma rupa bad kwei ka takma rnong, katba ka kynhun ka Ri bhoi District ka la bat ia ka kyrdan kaba lai da kaba ioh khur 2 tylli ki takma ksiar, 1 ka takma rupa, katba ka West Jaintia Hills ka la ioh ba kan khur kawei ka takma  ksiar.

Ha kane ka kynti ki la don haduh 83 ngut ki nongwan iashim bynta kaba kynthup ia 52 ngut ki shynrang bad 31 ngut ki kynthei, ha kaba u nongiashim bynta ba khynnah tam ha kane ka jingiakob dei u Lalgouhao Singson ba dang 11 snem ka rta bad ba la Rangbah tam pat dei bah Bapynkmen Ajar 53 snem ka rta.

Nalor kata ki la don ruh sa 5 ngut ki kynthei bad sa 3 ngut ki shynrang kiba la mih madan ban iakhun ha ka kyrdan jong ka rifle bad pistol ha ka kyrdan jong ka para shooter.

Ha kane ka sngi pynhap pyrda bad sam prize la ia don lang u Ashish IPS, SDPO,Sadar kum u Kongsan ha ryngkat u Wing Commander Pande bad u Bah Donald Wahlang, Executive Member MSOA nalor ki Technical Official, member ka SAM, kata u Davis Marak IPS, Vice President SAM, Niel Sooting, General Secretary SAM, Nicholas J Nongkhlaw, Publicity & Media Secretary SAM, Jeffrey Suting, Assistant Secretary SAM, ki Coach bad ki nongiashim bynta na ki club siat suloi bapher bapher kynhup ia ki kynhun na ki district ka Jylla.