Kyntu ka Sorkar ia ki DC ban pynbeit mardor ia ka jingshim jaka ban pyndep ia ka jingker sainar ha khappud

Syllad | The Rising MeghalayaMay 6, 2025

Ka Sorkar Jylla ka la bthah ia ki Deputy Commissioner (DC) ka Rilum Khasi bad Jaintia ba kin pynbeit noh mardor ia ka jingshim jaka khnang ban lah ban pyndep noh ia ka jingker sainar shiah ha ki jaka khappud ka India-Bangladesh.

Ia kane ka rai la shim ha ka jingialang ba la pyniaid da u Symbud Myntri Rangbah ka Jylla uba khmih ia ka Tnad Home (Police) u Bah Prestone Tynsong haka sngi ba Ar ha ka jingiadonlang u Inspector General (IG) ka BSF Meghalaya nalor ki ophisar ka NBCC.

U Bah Prestone u la khot pynlong ia kane ka jingialang ban bishar bniah ia ki jaka khappud namar ka jinglong jingman hapoh ka ri.

“Nga la khot ia ka jingialang bishar kam bad baroh ki District Collector bad nga la bthah ia ki baroh bad nga la thikna ba hapoh kine ki khyndiat taiew ngin la lah ban pynbeit ia ki jingeh halor ka jingshim jaka na ka bynta ban pyndep ia ka jingker sainar ha ki jaka khappud,” ong u Bah Prestone.

“Ngi la kwah shisha ban pyndep noh mardor ia kito ki bynta ha kaba ka jingker sainar ka dang sahteng namar da ka jingdon ia ka jingker ka sorkar jylla bad ka sorkar pdeng kynthup ia ki BSF da kaba suk kin lah ban peitngor ha kaba iadei bad ka jingwan rungtuh jong ki briew kiba na shabar,” u la bynrap.

Katkum ka jingpynpaw ka jong u, namar ka jingeh ha kaba iadei bad ka jingioh jaka kumba 33-34 kilomitar ki jaka khappud hapdeng ka India-Bangladesh ha ka thain West Jaintia Hills bad 7-8 kilomitar ha ka thain East Jaintia Hills ki dei ki bym pat ker sainar.

Haba kylli, u Bah Prestone u la ong, “Nga la bthah ia baroh ki Deputy Commissioner ka East Jaintia Hills bad West Jaintia Hills lem bad kiwei ki District ba kin bishar bniah biang ia kane ka kam da kaba shim kum ka mat kaba kongsan namar kumba phi ia tip ia ka jinglong jingman ha ka ri baroh kawei bad khamtam na ka bynta ki jylla ka thain Shatei Lammihngi kaba don ha khappud bad ka Bangladesh kam long satia kaba biang bad kaba iaid beit iaid ryntih.”

Ha kaba iadei bad ka jingdawa jong ki nongshong shnong ba ka jingker sainar shiah ka dei ban long na Zero Line, u Symbud Myntri Rangbah u pyntip ba ka sorkar Jylla ka la dep ban thoh sha ka Ministry of Home Affairs (MHA) ka Sorkar Pdeng ba kan bishar bniah halor kane.

“Watla katkum ki kyndon ba iadei bad ka jingker sainar shiah ha ki jaka khappud ka dei ban long hapoh ka 150 pruh ne yard, hynrei khyndiat ki jaka ha kaba kut lada ka jingker sainar kan iaid katkum kane ka kyndon kumta ruh katto katne ki shnong kin hap shabar jong ka jingker. Halor kane ka jinglong jingman kaei kaba ngi la leh ka long ba ngi la thoh shithi sha ka MHA ban pyrkhat ia kane ka bynta khamtam ki jaka ha kaba ngi hap ban pynthikna ba ki shnong ki dei ban hap shapoh jong ka jingker sainar. Ngi la dep ban thoh sha ka MHA bad na ka liang ka MHA ruh ka la pyrkhat halor kane bad ki dang don shuh shuh ki jingeh namar 2-3 tylli ki jaka ruh ki don ha kaba ngi dang ap ia ka jingmynjur jong ka MHA,” u la ong.

Haba pynpaw ba ka jinglong jingman kumba ka long mynta ha ki thain khappud ka dei kaba shongshngain, u Bah Prestone u la ong, “Ha baroh shilynter khappud hapdeng ka India bad ka Bangladesh ka long kaba shngain bad ki tnad treikam bapher bapher ki la bteng ban peitngor bha ia ka jinglong jingman bad ban pynthikna ia ka jingshngain jong ki nongshong shnong.”

“Ngi la dep ban bthah ba ym dei ban don ka jingwan rung beain jong ki nong Bangladesh sha India lymda ki don ia baroh ki kot ki sla kiba donkam. Kata ka dei ka hukum bad ngi bteng ban pynthikna ba kane ka jingioh wan rung beain kam dei satia ban jia,” u la bynrap.