Ka jingdawa bishar iaka Reservation Policy kam dei ka jingpharia jaidbynriew: JSM

Syllad | The Rising MeghalayaMay 31, 2023

Ka jingdawa ïaka hok ban bhah kam bhah jam hapoh Jylla katkum ka jingkylla ka por bad ka jingbun paid hapdeng u Garo, Khasi bad Jaintia kam mut ba pyrshah sorkar ne pynïapher jaidbynriew ne pynpharia jaidbynriew, la ong u working president Jaintia Students’ Movement (JSM) u Jimmy Raul Kharmuti.

Ula ong ka jingïakhih ki nongshong shnong jong ka Ri Jaintia hapoh ka shatri, Jaintia Coordination Committee for Reservation Policy, 1972 (JCCRP) kadei halor ka nongrim ban dawa ïaka hok longbriew manbriew ha ka rukom bhah kam bhah jam hapoh Jylla, kam dei kata ka jingiakhih ban pyrshah ïaka sorkar Jylla ne ban pynïapher jaidbynriew hapdeng u Khasi, Jaintia bad u Garo hapoh ka jylla Meghalaya.

Une u nongialam ka JSM ong ruh lada peit ki jaidbynriew Khasi bad Jaintia kiba don ka jingbun paid da 14 lak tam katba ki Garo ki don tang kumba 8 lak tam ha kaba ka jaidbynriew Khasi, Jaintia kala tam haka jingbun paid kumba 6 lak tam, halor kane ka nongrim ka Sorkar jylla kala dei ban review lane ban pynthymmai noh ïaka Reservation Policy 1972 kaba la rim bad noh shiliang shaba palat kaba lah ban wanrah ïaka jingeh kaba khraw ïaka Jylla hadien habud.

U Jimmy ula ong ruh ba ka jingkren jong uwei na ki nongïalam na Garo ba ym dei ban ktah iaka ding halor ban review ïa ka Reservation Policy, 1972 ban lait na ka jingum snam ha pdeng u Garo bad u Khasi, Jaintia dei kaba bakla bad ka bym don nongrim. Ula ong ban dawa ïa ka hok ba long solansor lyngba ka Reservation Policy katkum ka jingbun paid kan pynneh pynsah ia ka jingburom kylliang para jaidbynriew hapoh ka jylla, khnang ba ki pateng ban wan kin suk kin sain.

Ula ong ruh ba ka jingthaw thymmai iaka committee ban iakren iaka Reservation Policy bad ka Reservation Roster System ne ka jingpynbeit ryntih iaka bhah thungkam ka dei ka rai kaba biang eh bala leh ka sorkar bad u kyrmen ba ka resol ka mih na kane ka committee kan shim iaka rai kaba ai jinghun ia baroh.