Iaroh ka RBYF ia ka rai ka Sorkar Jylla ban pynkhlain shuh shuh ia ka MRSSA

Syllad | The Rising MeghalayaJune 16, 2025

 Ka Ri Bhoi Youth Federation (RBYF), Central Body ka la ai ka jingiaroh ia ka rai ka Sorkar Jylla ba la ialam da u Myntri Rangbah Conrad K Sangma ban nangpynkhlain shuh shuh ia ka Meghalaya Residents Safety and Security Act 2016 ((MRSSA) khnang ban tehlakam ia ka rung ka mih jong ki briew kiba na bar shapoh ka jylla Meghalaya.

Lah ban kdew ba na ka liang ka Sorkar Jylla dang shen ka la shim ia ka rai ban bsut ia ki kyndon kiba kham khlaiñ ha ka MRSSA 2016, kata hadien ka jingjia shah pyniap jong u nongwan shangkai na Indore u Raja Raghuvanshi u ba la shah pyniap klep ha la ka kurim ka Sonam Raghuvanshi ha Weisawdong Sohra ha kaba ka jingtohkit mynta ka dang iaid shakhmat pyrshah ia ka kurim jong u ka Sonam lem bad ka kynhun jong ka.

Haba kren bad ki lad pathai khubor u Bah Bipul Thangkhiew, President ka RBYF, u la ong, ba ka seng ka dap da ka jingkmen halor ka rai jong ka sorkar ban pynkhlaiñ shuh shuh ia ka kyndon ain jong ka MRSSA 2016 khnang ban lah ban pyrkhing bad tehlakam ia ka rung ka mih jong ki briew kiba na bar shapoh ka jylla Meghalaya.

U la ong ruh ba kane ka sienjam jong ka sorkar jylla ba la lamkhmat da u Myntri Rangbah ka Jylla u Conrad K Sangma ban nangpynkhlain ia ka MRSSA ka dei kaba la ap khmih lynti da baroh ki kynhun sengbhalang bad wat ki paidbah ka jylla kiba la bteng ban dawa ban pyntreikam ia ka Inner Line Permit (ILP) ha kane ka jylla Meghalaya.

“Ka RBYF ka la ai jingiaroh ruh ia ka sorkar jylla, ki bor pulit bad kiwei kiwei kiba la don bynta ban thwet ia ki ki runar kiba la pynjah burom ia ka jylla Meghalaya na ka jingshah pyniap u nong Indore ha la ka kurim bad kane hi ka dei ka jingjia kaba kum ka jylla ka hap ban kyndit bynriew halor ka jinglait lan ka rung ka mih ki briew kiba na shabar ka jylla lada ym don ia ka ain kaba khlain”, ong u president ka RBYF.

Nalor kata ka RBYF ka la dawa na ka sorkar jylla ba kan pyntreikam noh mardor sa ia ka Facilitation Centre kaba la sah khongreng kaba la dei ban tei ha Umling, Ri Bhoi District khnang ba lyngba katei ka khyrdop yn lah shisha ban peit pyrman ia ka rung ka mih jong ki briew kiba na bar kiba wan rung sha kane ka jylla.