Haduh 1681 ki samla ki ba pass ia ka NEET(UG) 2025 na ka jylla Meghalaya

Syllad | The Rising MeghalayaJune 15, 2025

Ki la don haduh 1681 na ki 3869 ngut ki samla pule na ka jylla Meghalaya kiba pass ia ka National Eligibility cum Entrance Test – NEET(UG) 2025 ha ka jingpynbna ia ka result da ka National Testing Agency (NTA) haka sngi Saitjain.

Na ki 4068 ngut ki samla pule na ka jylla Meghalaya kiba la pynrung kyrteng na ka bynta kane ka Entrance Test, ki don 3869 ngut kiba la iakhun ha kaba haduh 1681 ngut kiba la pass ia ka NEET(UG) 2025, ong ka NTA ha u kyrwoh.

Ha u snem 2024 ki la don 4009 ngut kiba pynrung kyrteng ha kaba 3815 ki la iakhun bad haduh 1849 ngut ki la pass ia ka NEET (UG) 2024, ka la ong.

Ka NTA ka la pynlong ia kane ka National Eligibility cum Entrance Test (UG) – 2025 na ka bynta palat 22 lak ngut ki samla pule ha ki 5468 tylli ki centre bapher bapher kiba don ha ki 552 tylli ki sorbah ha kylleng ka ri bad 14 ki sorbah shabar ka India ha ka 4 tarik u Jymmang 2025.

Ia kane ka eksam la pynlong ha ki 13 tylli ki jait ktien (Assamese, Bengali, English, Gujarati, Hindi, Kannada, Malayalam, Marathi, Odia, Punjabi, Tamil, Telugu bad Urdu).

Ia kane ka eksam la pynlong ha ki 14 tylli ki sorbah shabar jong ka ri, kata ha Abu Dhabi, Dubai, Bangkok, Colombo, Doha, Kathmandu, Kuala Lumpur, Kuwait City, Lagos, Manama, Muscat, Riyadh, Sharjah bad Singapore.