Dawa shimkhia ka JSU ia ka tnad pulit ban khanglad ia ka jingwan rungtuh ki nong Bangladesh

Syllad | The Rising MeghalayaApril 28, 2025

Ka Jaintia Students Union (JSU) haka 28 tarik Iaiong ka la dawa na ka tnad pulit ka Jylla ba kan shim ia ki sienjam kiba pyrkhing khnang ban lah ban khanglad ia ka jingwan rungtuh jong ki briew napoh Bangladesh.

Ha ka shithi sha u Superintendents of Police (SPs) ka West Jaintia Hills bad East Jaintia Hills District, ka JSU ka la pynpaw ka jingsngewkhia kaba jur halor ka jingnangkiew jong ki nongwan buhai shnong beain napoh Bangladesh kiba la wan rungtuh sha India lyngba ki jaka khappud jong ka Rilum Jaintia.

“Kine ki nongwan rungtuh la iohi ba ki la jia da ka jingiarap jong ki agent ne dalal kiba dei ki trai shnong kaba wanrah ka jingsngewkhia kaba jur halor ka jinglong jingman ha ki thain khappud ki jong ngi,” ka la ong.

“Halor kine ngi kyrpad jur ia ka tnad pulit ba kan shim mardor ia ki sienjam ban tehlakam ia kine ki kam beain da kaba pynkhlain ia ki khyrdop talasi ryngkat ka jingpynbun ia ki bor pahara da kaba pynjur ia ka jingtalasi ia baroh ki kali khamtam ia ki kali jong ki nongwan jngohkai lem bad kiwei kiwei ki kali kiba don jingsuba ia kiba ju pyndonkam ha kaba kit ia ki nongwan rung beain shapoh ka jylla,” bynrap ka seng ha ka shithi.

Nalor kata ka JSU ka kyntu ruh ia ka tnad pulit ban pynkhlain ia ka jingiatreilang bad ki bor shipai Border Security Force (BSF) na ka bynta ban peitngor bad pynjur ia ka jingpahara ha ki jaka khappud.

“Ngi kyrmen ba ka Tnad pulit kan shimkhia halor kane ka mat bad ban shim mardor ia ki sienjam ban iada bad pynneh ia ka jingshngain, ka jinglong kyrpang bad na ka bynta ka bha ka miat jong ki trai shnong ka thain,” ka la bynrap.