Dawa ka KSU ia ka NEIGRIHMS ban khot mardor ia ka jingialang ban pynbeit halor ka thungkam nurse

Syllad | The Rising MeghalayaMay 7, 2025

Ka Khasi Students’ Union (KSU) ha ka 6 tarik Jymmang ka la dawa na ka North Eastern Indira Gandhi Regional Institute of Health & Medical Sciences (NEIGRIHMS) ba kan khot mardor ia ka jingialang ba kyrkieh jong ka Governing Council ban pynbeit ia ki kam kiba iadei bad ka jingthungkam ia ki nurse hapoh ka Institute.

Ha ka shithi sha u Director ka NEIGRIHMS, u Dr N Mehta, u President ka KSU u samla Lambokstar Marngar ula ong, “Ngi kyrpad ia phi ban shim ia ki sienjam ban khot pynlong mardor ia ka jingialang ba kyrkieh jong ka Governing Council khnang ban pynbeit ia ki mat kiba donkam ia ka jingtuklar kaba mardor”.

U samla Lambokstar u la ong ba ka jingialang ba la pyniaid da u Myntri sorkar u Bah Paul Lyngdoh ba ryngkat ki bor pyniaid ka NEIGRIHMS bad ki nongialam ka KSU ha ka 5 tarik Jymmang la rai ban pynsangeh shwa ia kane ka jingthungkam kaba mynta tad haduh ban da lah pynbeit ia baroh ki mat ba la wanrah da ka seng.

U la ong ba la rai ruh ba ka NEIGRIHMS kan pynbeit hi da lade halor ki kam kiba ka lah ban leh bad ia ki kam ba kam lah ban shim rai da ka NEIGRIHMS yn wanrah ha ka Governing Council bad sha ka Ministry of Health & Family Welfare ka Sorkar India.

Une u nongialam ka KSU ula bthah ruh ia ki bor pyniaid ka NEIGRIHMS ba kin shim rai ia kiei ki kam kiba ka lah ban pynbeit hi da ka Institute bad ki kam kiba hap ban buh hakhmat ka Governing Council lane ka Ministry.

Ki mat kiba hakhmat eh kiba ka KSU ka la dawa ha ka jingiakhih shong kyllain mungor ka long ba ia ka rta thungkam ka dei ban long kum kaba la dep kata 35 snem ia ki Nursing Officer bad kumjuh ruh ia ki rta ba la buh hashwa ha ki kam bapher bapher,  ban pyntreikam ia ka bhah thungkaba kaba 80:20 ia ki nurse kynthei bad shynrang, ka experience certificate tang na ki hospital ba 50 jingthiah ban weng noh ha ka thungkam Nursing Officer, ka exmination centre ka dei ban long ha Meghalaya ym ha kiwei pat ki jylla bad ba dei ruh ban pynlong ia ki eksam da ka offline mode, ban bishar bishar ia ka roster register nalor kiwei kiwei.