Ai jingkyrshan ka JYF iaka jingiakhih jong ka ECC Sutnga ban khang ia baroh ki Coke Factory

Syllad | The Rising MeghalayaAugust 6, 2021

Ka Jaintia Youth Federation (JYF) kala ai ka jingkyrshan ba pura ia ka Environmental Coordination Committee (ECC) Elaka Sutnga halor ka jingdawa ban khang khyrdep iaki Coke Factory ne ki karkhana saiñ rnga dewiong beain kiba la ieng rasong kum ki tit ha Elaka Sutnga bad East Jaintia baroh kawei.

“Ka jingshna ia kine ki karkhana Coke Factory ruh ka la long shaba palat ha kaba tang ha ka Elaka Sutnga haduh 45 tylli bad baroh ki don Kim ba 56 hapoh ka East Jaintia Hills bad kane kan ktah iaka koit ka khiah u nongshong shnong na ki lyer bih kiba mih na ka jingthang ia u dewiong,” la ong u president JYF u J Pala.

Ka JYF ka ai jingiaroh ia u MLA ka Sutnga Saipung Constistuency Shitlang Pale uba la kloi ban iadonlang bad kyrshan ia kane ka jingdawa ka ECC Elaka Sutnga da kaba u la ia leit synranlang ia ki paidbah ka Elaka Sutnga ban dawa ia ka hok jong u paidbah ka constituency jong u bad dawa weng noh ia kine ki coke factory beain.

Ka JYF kala pynpaw iaka jingsngewlyngngoh ba DC East Jaintia Hills dain shi dain u la pynbna ba ki karkhana coke kiba bym shym la ioh jingbit ki dei ban khang, phewse la sakhi ba kine ki kharkhna ki iaid bteng ban shna iaki karkhana bad thang ia u dewiong uba la pynjaboh iaka haw haw bad ka sawdong sawkun ka mariang.

Ka JYF kala buh jingkylli ruh nangno kine ki karkhana ki ioh dewiong ban saiñ rnga dewiong wat hadpeng ba ka jngtih bad ka jingshalan dewiong ha Jylla ka dang khang.

Ka JYF kala kyntu iaka sorkar bad ka bor synshar district ban khang mardor ia kine ki karkhana kiba beaiñ bad dawa ruh ban tohkit halor kane ka kam beaiñ.